गोर साकी/ बगर भेजेर मेदडी..! भीमणीपुत्र
*वाते मुंगा मोलारी*
My swan song
*गोर साकी/ बगर भेजेर मेदडी..!*
*आपणे नैसर्गिक बुद्धीरो वापर करणू ई सिक ये साकी माइती मळचं...!*
गोर साकी ई लोकसायित्येमं गणावचं.साकीर भाषा ई समाजमनेर भाषा छ.साकीर भाषार संदर्भेर जर केनी जीभाळी (जीव्हारी) लागतो विये तो ओरो केनी दोस देतू आयेनी.साकी एक सामाजिक शाळा छ..संस्कार केंद्र छ.सामाजिक व्यवस्था सुरळीत रेणू ई साकीरो केंद्रवर्ति सूत्र छ.
सायित्यसत्ता ई सामाजिक,धार्मिक अन राजकीय चळवळीरो नेतृत्व करचं.जे समाजेर सायित्य चळवळ प्रगल्भ रेयेनी ओ समाजेरी सामाजिक,धार्मिक अन राजकीय चळवळी दिशाहीन रचं.सामाजिक,धार्मिक,राजकीय चळवळीर नेतृत्व करेर धम्मक भी गोर साकी शिवारेम छ.मौखिक सायित्ये माईरो इ गोर सायित्येरो शिवार जतन वेणू;गोरबोली भाषार मालकीरो ई साकीरो शिवार सायित्येरे मुख्य प्रवाहेम आणू;आपण ओनं लाणू ई आज काळेर गरज छ..!
राजकारणेर धासादोडीमं गोरबोली भाषा,भाषासायित्येर अस्तित्व आज धोकेम आवगो छ.ई गोरबोली भाषारो दुर्दैव छ..!
एक खड्या रं. ऊ खड्या बुडो वेगोतो.धासन येड रमेर भी ओनं आसंगणी कोनी आरीती.ओर माई कांयी राम कोनी रं,भुकेती ओरो पेट लकलक वेरोतो.कळ्णो भगवानेरो एक साळ्या ओनं जावतूवणा दकागो.साळ्यान हाक मारन केयेलागो क,साळ्या साळ्या! आबं मार कांयी खरो छेनी भा!जायेर बानीपं छू,रोजेर वाट छ कलागो!चालतू छेडा तोन एक सिक देन जाऊचूं केताणी साळ्यानं कनेसी बलायो.वरेसी आजो तार कानेमं एक वात कुचू कलागो..!
साळ्या केयेलागो क,खड्या मामा,तू कांयी मनं वेंडोमेंडो समजमेलो छी कांयी,तार कनेसी आयेनं?तार कावा मनं कळेनी कांयी? खड्या केयेलागो क,साळ्या!म आबं बुडो वेगो छू रे..!धासन येड रमेर भी मार मायी राम छेनी..आट दनेर भुको तरसो एकजागं पडो वेरो छू.जसी साळ्या केयेलागो क,हानू सुदो सुदो कनी पचं,तार खायेपीयेर वेवस्था म करनाकूचू कलागो !
हानू केताणी साळ्या जंगलेमं भडकगो.जातू जातू जंगलेमं ओनं एक मेदडी (हाण्णीर एक जात ) चररी जकोण दकागी.साळ्या मेदडीनं हाक मारन छेटीती केयेलागो मेदडी मासी!आपणे जंगलेरो नायक खड्यामामा वणान बेमार पडो छ.हाबालज म ओर खबर लेन आयो छू.से ओर खबर लेन जा जान आरे छ.मेदडीमासी चालतू छेडा तू भी ओर खबर ले लं.चालतू छेडार ओर सिक सांबळ लं.पटको चाल,मरगो गिरगो तो तार बोलेर रेजाये हानू केन साळ्या मेदडीनं खड्या कन झललेगो कनेसी जायेर बाद साळ्या मेदडीनं केयेलागो क,मेदडी मासी चमक मत.खड्या मामा वटाणो पडरो छ. ओनं ऊटेबेसेर मसकल वेरो छ.ढाळ भी निकळेनी..कनेसी जाताणी तार कानेमं कांयी कचं जकोण सांबळ!
भोळभाळ मेदडी साळ्यार वातेपं भरोसो रकाडन खड्यार कनेसी जापडी,जसी खड्या झडप मारन मेदडीर नल्डी पकडन झंजोडन मार नाको.झंजोडेती मेदडीर मुंडी परसभर छेटी जान पडगी.भुको तरसो खड्या मेदडीनं खायेर नांदेम लाग्गो.येवडी चंदरो साळ्या मेदडीर मुंडीनं झोको झोको टांगेती रडान आपणे कनं कर लिदो.मुंडीनं भाटापं पटक पटकन मुंडी फोडन मुंडी माईरो भेजो निकाल खालेताणी मुंडीर ठेपी जू वेत्ती जू लगान मेदडीर मुंडीनं झोकेती खड्यासामू रडा दिनो.
मेदडीर बोटी बोटी खालेर बाद खड्यानं मेदडीर मुंडी हारदागी.खड्या साळ्यान केयेलागो साळ्या!येर मुंडी कतं छ रे..? साळ्या केयेलागो क,ऊ कांयी तार ढेगरे कनं पडीवेरी कलागो. खड्या होटो सरकन मुंडी ओर कन कर लिदो..चाबन मुंडी फोडेन किदो जसी मुंडीर मातेपरेर फोडीफाडी ठेपी आलादी हेटं पडगी.आबं खड्या मुंडी माईर भेजो खांऊ केन मुंडी माईरो भेजो देकेन लग्गो,खड्यानं मुंडीमं भेजो कतीज दकायेनी,जसी खड्या साळ्यानं केयेलागो क,साळ्या! ये मुंडीमं तो भेजो छेनी रे..आस कस मेदडी लायो तू बगर भेजेर ?
जसी साळ्या केयेलागो,खड्या मामा!मेदडीनं भेजो रेयेवाळ तो ऊ तारताणू कसेन आयेवाळ रं मरेनं!
भेजो छेनी करन तो मेदडी तारताणू आयी छ..!
खड्या केयेलागो ई भी वात खर छ..!!
*भीमणीपुत्र*
*मोहन गणुजी नायक*
My swan song
*गोर साकी/ बगर भेजेर मेदडी..!*
*आपणे नैसर्गिक बुद्धीरो वापर करणू ई सिक ये साकी माइती मळचं...!*
गोर साकी ई लोकसायित्येमं गणावचं.साकीर भाषा ई समाजमनेर भाषा छ.साकीर भाषार संदर्भेर जर केनी जीभाळी (जीव्हारी) लागतो विये तो ओरो केनी दोस देतू आयेनी.साकी एक सामाजिक शाळा छ..संस्कार केंद्र छ.सामाजिक व्यवस्था सुरळीत रेणू ई साकीरो केंद्रवर्ति सूत्र छ.
सायित्यसत्ता ई सामाजिक,धार्मिक अन राजकीय चळवळीरो नेतृत्व करचं.जे समाजेर सायित्य चळवळ प्रगल्भ रेयेनी ओ समाजेरी सामाजिक,धार्मिक अन राजकीय चळवळी दिशाहीन रचं.सामाजिक,धार्मिक,राजकीय चळवळीर नेतृत्व करेर धम्मक भी गोर साकी शिवारेम छ.मौखिक सायित्ये माईरो इ गोर सायित्येरो शिवार जतन वेणू;गोरबोली भाषार मालकीरो ई साकीरो शिवार सायित्येरे मुख्य प्रवाहेम आणू;आपण ओनं लाणू ई आज काळेर गरज छ..!
राजकारणेर धासादोडीमं गोरबोली भाषा,भाषासायित्येर अस्तित्व आज धोकेम आवगो छ.ई गोरबोली भाषारो दुर्दैव छ..!
एक खड्या रं. ऊ खड्या बुडो वेगोतो.धासन येड रमेर भी ओनं आसंगणी कोनी आरीती.ओर माई कांयी राम कोनी रं,भुकेती ओरो पेट लकलक वेरोतो.कळ्णो भगवानेरो एक साळ्या ओनं जावतूवणा दकागो.साळ्यान हाक मारन केयेलागो क,साळ्या साळ्या! आबं मार कांयी खरो छेनी भा!जायेर बानीपं छू,रोजेर वाट छ कलागो!चालतू छेडा तोन एक सिक देन जाऊचूं केताणी साळ्यानं कनेसी बलायो.वरेसी आजो तार कानेमं एक वात कुचू कलागो..!
साळ्या केयेलागो क,खड्या मामा,तू कांयी मनं वेंडोमेंडो समजमेलो छी कांयी,तार कनेसी आयेनं?तार कावा मनं कळेनी कांयी? खड्या केयेलागो क,साळ्या!म आबं बुडो वेगो छू रे..!धासन येड रमेर भी मार मायी राम छेनी..आट दनेर भुको तरसो एकजागं पडो वेरो छू.जसी साळ्या केयेलागो क,हानू सुदो सुदो कनी पचं,तार खायेपीयेर वेवस्था म करनाकूचू कलागो !
हानू केताणी साळ्या जंगलेमं भडकगो.जातू जातू जंगलेमं ओनं एक मेदडी (हाण्णीर एक जात ) चररी जकोण दकागी.साळ्या मेदडीनं हाक मारन छेटीती केयेलागो मेदडी मासी!आपणे जंगलेरो नायक खड्यामामा वणान बेमार पडो छ.हाबालज म ओर खबर लेन आयो छू.से ओर खबर लेन जा जान आरे छ.मेदडीमासी चालतू छेडा तू भी ओर खबर ले लं.चालतू छेडार ओर सिक सांबळ लं.पटको चाल,मरगो गिरगो तो तार बोलेर रेजाये हानू केन साळ्या मेदडीनं खड्या कन झललेगो कनेसी जायेर बाद साळ्या मेदडीनं केयेलागो क,मेदडी मासी चमक मत.खड्या मामा वटाणो पडरो छ. ओनं ऊटेबेसेर मसकल वेरो छ.ढाळ भी निकळेनी..कनेसी जाताणी तार कानेमं कांयी कचं जकोण सांबळ!
भोळभाळ मेदडी साळ्यार वातेपं भरोसो रकाडन खड्यार कनेसी जापडी,जसी खड्या झडप मारन मेदडीर नल्डी पकडन झंजोडन मार नाको.झंजोडेती मेदडीर मुंडी परसभर छेटी जान पडगी.भुको तरसो खड्या मेदडीनं खायेर नांदेम लाग्गो.येवडी चंदरो साळ्या मेदडीर मुंडीनं झोको झोको टांगेती रडान आपणे कनं कर लिदो.मुंडीनं भाटापं पटक पटकन मुंडी फोडन मुंडी माईरो भेजो निकाल खालेताणी मुंडीर ठेपी जू वेत्ती जू लगान मेदडीर मुंडीनं झोकेती खड्यासामू रडा दिनो.
मेदडीर बोटी बोटी खालेर बाद खड्यानं मेदडीर मुंडी हारदागी.खड्या साळ्यान केयेलागो साळ्या!येर मुंडी कतं छ रे..? साळ्या केयेलागो क,ऊ कांयी तार ढेगरे कनं पडीवेरी कलागो. खड्या होटो सरकन मुंडी ओर कन कर लिदो..चाबन मुंडी फोडेन किदो जसी मुंडीर मातेपरेर फोडीफाडी ठेपी आलादी हेटं पडगी.आबं खड्या मुंडी माईर भेजो खांऊ केन मुंडी माईरो भेजो देकेन लग्गो,खड्यानं मुंडीमं भेजो कतीज दकायेनी,जसी खड्या साळ्यानं केयेलागो क,साळ्या! ये मुंडीमं तो भेजो छेनी रे..आस कस मेदडी लायो तू बगर भेजेर ?
जसी साळ्या केयेलागो,खड्या मामा!मेदडीनं भेजो रेयेवाळ तो ऊ तारताणू कसेन आयेवाळ रं मरेनं!
भेजो छेनी करन तो मेदडी तारताणू आयी छ..!
खड्या केयेलागो ई भी वात खर छ..!!
*भीमणीपुत्र*
*मोहन गणुजी नायक*
Comments
Post a Comment